ආදරණීය පුරප්පාඩු ඉල්ලුම් කරුවන් වෙත, සෝමාවතී නැන්දා දිවිය ලෝකේ දේවතාවක් උන්දැ හිටි කාලෙ දඹදිව වැන්දෙ නැතුවාට ඇතිහැකි පමණ පිටවුන්ගේ කුසේ ගින්දර නිව්වා ජෝසප් මාමා ස්වර්ගෙට යනවා දැක්කා උන්දැ හිටි කාලෙ ශුද්ධ වූ දේශෙ නොගියාට හිටිය කාලෙදි උන්දෑ බොහොම සතුටින් උන්නා ෆාතිමා දාත්තා හජ් ගියේ නැතුවාට ඔහේ උන්නටත් වඩා හොඳට මෙහෙ ඉන්නවා උන්දැගේ හිනාවට මගෙත් හිත හරි නිවෙනවා ඊයෙ කෝමහරි තුන්දෙනා සෑහෙන්න බර කතාවක් ඉන්න බැරිකමට මාත් දැම්මා හොට කීපවතාවක් අම්මපා ඒක අහලා මට හැදුනා යකාගෙම හිනාවක් උපතින්ම ලද ආගමට වුව කුලල් කන රුදු මිනිසුනේ...!!! ඇප්ලිකේශන් දැම්මට මෙහෙ එන්න සීරුවට කොලිෆිකේශන් ඇහුවම ඒ ලියන තීරුවට වන්දනාවෙම ගිහින් අනේ අහවල් දේකටද පිරිත් පොත් ඍග් වේද බයිබලය කුරානය උස්සන් ඉඳපු බරටම අන්තිමට තොපේ කොඳු ඇද වෙලා ඔන්න ඒත් තොපි තාමත් කුලල් කනවද හැත්ත සෝමාවතී නැන්දයි ජෝසප් මාමයි ෆාතිමා දාත්තත් එකතුවමැයි කියන්ඩෙයි කිව්ව තොපිට මැරෙන්න කලියෙන්වත් සතුටින් ඉඳපල්ලයි කියලා එහෙනම් තරහ අවසර මරණ මංචකේදි හමුවෙමු මීට, සදා නොවෙනස් වන ආදරයෙන්, මාරයා
ලලින්ද්‍යා ඈන් ප්‍රභාශිනී විතානගේ